Markaðsaðstæður voru jákvæðar á árinu 2022 líkt og árið 2021 eftir að söluverð áls hafði verið lágt árið 2020. Það fór lægst í 1.460 USD/tonn í apríl 2020 en hækkaði þegar leið á árið og var að meðaltali 1.700 USD árið 2020. Hækkun hélt áfram á árinu 2021 og árið 2022. Álverð var að meðaltali 2.480 USD/tonn árið 2021 og 2.820 USD/tonn árið 2022.

Útflutningsverðmæti Norðuráls námu 141 milljarði króna árið 2022. Af þeim tekjum námu greiðslur til íslenskra aðila 64,5 milljörðum króna í formi opinberra gjalda, launa og innkaupa frá innlendum birgjum og þjónustuaðilum. Launagreiðslur ásamt launatengdum gjöldum námu 7,9 milljörðum króna og meðallaun starfsfólks voru 9,8 milljónir króna á ári.

Norðurál skilar verðmætum til samfélagsins með ýmsum hætti. Skattspor félagsins árið 2022 nam 5,0 milljörðum króna. Með öflun gjaldeyristekna, innkaupum á innlendri vöru og þjónustu, greiðslu skatta og opinberra gjalda, sköpun fjölmargra vel launaðra starfa og almennum og víðtækum stuðningi við samfélagið á Vesturlandi hefur Norðurál mikil og jákvæð áhrif á íslenskt efnahagslíf

Efnahagsleg verðmæti af starfsemi Norðuráls námu rúmum 167 milljörðum króna árið 2022 og samanstanda þau af sölutekjum, fjármagnstekjum og söluhagnaði eigna. Þar af var 64,5 milljörðum króna ráðstafað til íslenskra aðila með margvíslegum hætti, svo sem launagreiðslum til starfsfólks, launatengdum gjöldum, kaupum á rafmagni, kaupum á aðföngum og þjónustu, og greiðslu skatta og annarra opinberra gjalda.

Sú losun gróðurhúsalofttegunda sem er beintengd framleiðsluferli Norðuráls fellur undir viðskiptakerfi Evrópusambandsins með losunarheimildir (ETS). Markmið þess er að draga úr losun frá framleiðslu stærri iðnfyrirtækja í Evrópu þar sem fyrirtækin þurfa að kaupa losunarheimildir. Viðskiptakerfið virkar því sem hagrænn hvati fyrir iðnfyrirtæki til að draga úr losun. Árið 2022 nam gjaldfærsla Norðuráls vegna losunarheimilda 529 milljónum króna.

Framkvæmdir við nýja framleiðslulínu Norðuráls gengu vel á árinu 2022 og er áætlað að þeim ljúki á fyrri hluta næsta árs. Ný framleiðslulína gerir Norðuráli kleift að framleiða verðmætari vörur hér á landi með minni orkunotkun og minna kolefnisspori. Umtalsverð orka sparast með áframvinnslu hérlendis eða um 40%.

Um er að ræða fjárfestingaverkefni sem hleypur á um 120 milljónum dala, eða tæpum 17 millj- örðum króna. Verkefnið er fjármagnað með grænni fjármögnun hjá Arion banka. Græn fjár- málaumgjörð Arion banka byggir á viðmiðum Alþjóðasamtaka aðila á verðbréfamarkaði, ICMA, og horfir til flokkunarkerfis Evrópusambandsins og heimsmarkmiða Sameinuðu þjóðanna.

Móðurfélag Norðuráls, Century Aluminum Company, og dótturfélög þess hafa einsett sér að ástunda gott siðferði og fara að lögum í viðskiptum um allan heim. Bandarísk og alþjóðleg lög og reglur banna spillta viðskiptahætti, s.s. óeðlilega fyrirgreiðslu og rangfærslur í bókhaldi og öðrum gögnum.

Tilgangurinn með stefnunni er að setja upp staðla og verklag sem starfsmönnum er skylt að hlíta til að tryggja að farið sé að lögum og tryggja gott orðspor fyrirtækis sem stundar heiðarleg viðskipti.